Gen 14 | UBR | STEP | Wera fani sisawar gibunai, baigagam gagamin bag on nan Canaan tafanamai imatar. Ato aiwabis bat wabis min: Amraphel on Shinar mafam emon, Arioch on Ellasar mafam emon, Kedorlaomer on Elam mafam emon a Tidal on Goiim mafam emon on sigat tafanam tani an aiwabis engon nim on mat siti gagam mes. Osi aiwabis nim wabis min: Bera on Sodom an aiwab, Birsha on Gomorrah an aiwab, Admah on Shinab an aiwab a Shemeber on Zeboiim an aiwab a Bela an aiwab orot (on mafam min ari seyoyorai Zoar),

Genesis 14

Abram Lot Ibaisin Iboseirai

1 Wera fani sisawar gibunai, baigagam gagamin bag on nan Canaan tafanamai imatar. Ato aiwabis bat wabis min: Amraphel on Shinar mafam emon, Arioch on Ellasar mafam emon, Kedorlaomer on Elam mafam emon a Tidal on Goiim mafam emon on sigat tafanam tani an aiwabis engon nim on mat siti gagam mes. Osi aiwabis nim wabis min: Bera on Sodom an aiwab, Birsha on Gomorrah an aiwab, Admah on Shinab an aiwab a Shemeber on Zeboiim an aiwab a Bela an aiwab orot (on mafam min ari seyoyorai Zoar), 3 Osi aiwabis bat on Siddim roubabanai (on roubaban min seyoyorai Una Kamitin) nan wou orot kuayo gagamn mat sikaita. 4 Kwanda engon auyotoat an yayatan ruam, osi aiwabis on Kedorlaomer an baibad babanai sima baise kwanda auyotoat an yayatan ton amonai osi sibosuruf Kedorlaomer fonan siseseir. 5 Kwanda auyotoat an yayatan bat amonai Kedorlaomer a aiwabis ton asi wou orot mat sikaita sigat Rephai, on Ashteroth Karnaim nan, Zuz on Ham nan, Emit on Shaveh Kiriath nan sigagam sisowar sabu engon sibomerubes. 6 Mat osi sigagam sisowar Hor sabu, Seir oyau oyau nan simama a nana inai El Paran efan koiteterin bisinai simama on engon sibomerubes. 7 Namon osi simatabir men sinai au En Misphat (on min ari seyoyorai Kadesh), on nan sigagam sisowar Amalek tafanamai sabu engon tutufin sibomerubes a Amor yangan iyabon Hazazon Tamar nan simama on mat engon sibomerubes.

8 Namon Sodom an aiwab, Gomorrah an aiwab, Admah an aiwab, Zeboiim an aiwab a Bela an aiwab (on min ari seyoyorai Zoar). Osi aiwabis nim on sigat sinai Siddim roubabanai nan bai gagam an uwar sitein aiwabis bat mat siti gagam mes. Osi aiwabis bat min Kedorlaomer, Amraphel, Tidal a Arioch.

10 On roubabanai nan on dogu amosi kolta rababaris si yen ato on an rai Sodom a Gomorrah asi aiwabis asi wou orot mat si yai on, asi wou orot fani on osi dogu amosi sifeu ato aiwab orot ton a asi wou orot fani on siyayai sinai au oyau. 11 Aiwab orot bat sisowar ato Sodom a Gomorrah asi sawar obis engon tutufin a asi bayu mat siboen sinai. 12 Osi Abram abun Lot a an sawar gugu mat on engon siboen, yabin on Lot min Sodom nan imama.

13 Orot tani i yai on totor wat inai Hebrew orot Abram ikasonai. Abram on Amor orot Mamre an wengar gagamis bisisi imama, on Eshcol a Aner tais tuas, osi min Abram tuturan, on mat sikaita simama. 14 On an rai Abram dura itatam abun Lot on sifatumai, on an wou orot engon 318 iyabon on mat simama on iruayois ato iboes mat sigib yeinis sinai Dan mafamai nan. 15 Fom amonai Abram an orot engon ikusesebis asi efan asi efanai nan iyeinis ato mat sigagam sisowar ato sifaitanis sinai au Hobah mafam, Damascus au gorof na. 16 Abram on sawar engon igaturen iboen men. Mat on abun Lot a an sawar gugu, jever fani a agirotis fani iboes imatabir.

Melchizedek Abram Imomoginai

17 Abram on isowar Kedorlaomer a an aiwab tuturan mat ibomerubes gibunai imatabir men. On i nat au go ato Sodom an aiwab orot on Shaveh roubaban emon igat it nefotai mes. (on Shaveh roubaban min ari seyoyorai Aiwab An Roubaban) 18 Namon Melchizedek, Salem an aiwab orot a God Aiyetunenei Bag an tafaror bai netewarotin on rafi sarar a sareu wine iboen inat Abram aurin. 19 Melchizedek on Abram imomoginai ato iyawur iyau, “God Aiyetunenei Bag, on safam a tafanam Fourisotin on ini momoginem. 20 God Aiyetunenei Bag on tani fain tani duranai yabin on faiwar item ugagam usowar am ragit engon ubomerubes.” Ato Abram abi abi bai gagam emon iboen i nat on matas engon auyotoat iya ato on emon matan tani on ibo aiwab orot Melchizedek itai.

21 Sodom an aiwab orot on Abram iyawur iyau, “Om abi abi engon tutufin on un botanen, baise au sabu wat on eiteu men.”

22 Abram iyafotai iyau, “Yau on BADA God Aiyetunenei Bag, safam tafanam Fourisotin Wabinai abi faro, 23 yau men arimon am sawar gugu ai akikiman an uram turin wat on an botan, onai om unau yau emon Abram inat sawarotin imatar. 24 Yau tou auriu on men abi tani an botan on, baise bayu ato au orot si yam on wat an botan. Baise yau tuturau Aner, Eshcol a Mamre on sawar turin wonites yabin osi on yau mat wanai wai gagam.”